Verslun Kaupfélags Ísfirðinga á Ísafirði 1920 - 1995

„Verslun á besta stað í bænum“ er heiti sýningar sem Skjalasafnið Ísafirði var með í tilefni af norræna skjaladeginum 2011. Sýnd voru skjöl og bækur frá Kaupfélagi Ísfirðinga sem stofnað var 30. apríl 1920 og starfaði til ársins 1995.

Kaupfélag Ísfirðinga var stofnað 30. apríl 1920. Félagið hóf starfsemi í smáum stíl með matvörubúð í Félagsbakaríinu við Silfurgötu og þar var sölubúð félagsins til ársins 1927 en var þá flutt í stærra og betra húsnæði að Hafnarstræti 1. Fyrst um sinn var útibú þó rekið áfram í gömlu búðinni. Sumarið 1929 færði félagið enn út kvíarnar og setti upp útibú í efri hluta kaupstaðarins, í Hrannargötu 8, þar sem verslun Leós Eyjólfssonar hafði verið til húsa. Starfaði þetta útibú fram til ársins 1936.

Umsvif félagsins jukust talsvert á þessum árum og fljótlega þótti sýnt að húsakynnin að Hafnarstræti 1 væru of lítil. Var þá hafinn undirbúningur að byggingu sérstaks verslunarhúss fyrir kaupfélagið og fékkst byggingarlóð á besta stað í bænum, á horni Austurvegar og Hafnarstrætis. Framkvæmdir hófust vorið 1930 og í desember 1931 flutti kaupfélagið aðalverslun sína í nýja húsið. Var það 300 fermetrar að grunnfleti, þrjár hæðir og kjallari. Á neðstu hæðinni voru matvöru-, búsáhalda-, vefnaðarvöru- og kjötbúð. Á annarri hæð hússins voru skrifstofur félagsins og á efstu hæðinni voru íbúðir.

Í maí 1958 opnaði Kaupfélag Ísfirðinga kjörbúð á Ísafirði sem var hin fyrsta sinnar tegundar á Vestfjörðum. Var hún í norðurálmu verslunarhússins þar sem áður höfðu verið vörugeymsla og mjólkurbúð. Gólfflötur kjörbúðarinnar var 110 fermetrar en auk þess voru kjötafgreiðsla og frystiklefi á sömu hæð. Teiknistofa SÍS teiknaði búðina og skipulagði, en alla umsjón og forgöngu um verkið hafði Jóhann T. Bjarnason, þáverandi kaupfélagsstjóri á Ísafirði.

Rekstur Kaupfélags Ísfirðinga þyngdist mjög þegar kom fram á níunda áratug 20. aldar og árið 1995 hætti félagið starfsemi. Verslunarkeðjan Samkaup tók þá verslunarhúsið við Hafnarstræti og Austurveg á leigu og opnaði þar matvöruverslun.