Júní 2018

HEIMSÓKN GRÆNLENDINGA TIL ÍSAFJARÐAR 1925

Síðla í ágúst 1925 lagðist danska skipið Gustav Holm að Ísafjarðarbryggju en um borð voru 89 Grænlendingar auk danskrar áhafnar á leið norður til Scorebysunds, nánar tiltekið til Ittoqqortoormiit til að stofna þar nýlendu. Aðstæður til veiða voru taldar með besta móti við þennan lengsta fjörð heims en fyrst og fremst var verið að tryggja dönsk yfirráð á svæðinu og koma í veg fyrir landnám Norðmanna sem gerðu kröfu um yfirráð á stórum hluta Austur-Grænlands.

Heimskautafarið Gustav Holm kom frá Ammassalik til Ísafjarðar til að taka þar vistir en jafnframt þurfti að vígja prestinn sem þjónusta skyldi sóknarbörn hinnar nýju nýlendu. Heimsóknin varði í þrjá og hálfan sólarhring og naut meirihluti Grænlendinganna gestrisni heimamanna en nokkur hópur fór ekki í land, einkum eldra fólk og börn. Þegar fréttist af komu skipsins til Ísafjarðar var hafist handa við að undirbúa komu Grænlendinganna og lögðu bæjarbúar sig fram um að taka sem best á móti hinum útlendum gestum, t.d. var farið í skemmtiferð inn í Tunguskóg og efnt til samsætis í Bíóhúsinu þar sem boðið var upp á fjölbreytta dagskrá og veitingar. Eftir þriggja daga viðkomu á Ísafirði voru landfestar leystar og skipið sigldi norður á bóginn, til Ittoqqortoormiit, nyrstu byggðar Austur-Grænlands. Þar búa í dag um 400 manns, flestir afkomendur þeirra sem komu til Ísafjarðar fyrir 93 árum.