Skipan hússins

Aðalinngangur Safnahússins er að sunnanverðu. Hönnun hússins ber ljóslega með sér að þar var gert ráð fyrir megininngangi en anddyrið var yfirleitt notað til annarra þarfa á meðan sjúkrahúsið starfaði sem slíkt – enda rík þörf fyrir plássið. Á fyrstu hæð er að finna útlánsbækur bókasafnsins og afgreiðslu, ásamt aðstöðu fyrir börn og ungmenni.

Aðalstigagangur byggingarinnar er breiður og mikill, enda þurfti að flytja rúmfasta sjúklinga þar um. Í dag er lyfta í húsinu sem tryggir gott aðgengi að öllum hæðum. Á stigapalli og veggjum stigagangsins upp á aðra hæð má að jafnaði sjá listaverk tengd sýningum Listasafns Ísafjarðar.

Þegar komið er upp á aðra hæð blasir við fallegt bogaherbergi þar sem setjast má niður yfir kaffibolla og kíkja í dagblöð eða tímarit. Til hliðar eru vinnuherbergi, annað ætlað gestum en hitt starfsfólki bókasafnsins.

Að öðru leyti skiptist hæðin í tvo stóra sali: Að vestanverðu er sameiginlegur lessalur bókasafns og skjalasafns en einnig aðstaða fyrir litla viðburði af ýmsu tagi. Að austanverðu er sýningarsalur listasafnsins. Í stiganum á leið upp á þriðju hæð má sjá ýmsa gripi frá þeim tíma þegar húsið þjónaði sem sjúkrahús. Sumir gripanna eru eldri eða frá tíma sjúkrahússins að Mánagötu 5 á Ísafirði sem var starfrækt 1897–1925. Á þriðju og efstu hæð hússins er vinnuaðstaða fyrir starfsfólk, skrifstofur og kaffistofa.

Kjallari hússins er að mestu lokaður öðrum en starfsfólki að undanskildu vinnurými sem ætlað er fyrir námskeið og vinnustofur.

Salerni eru á öllum hæðum hússins. Salerni fyrir fatlaða er í kjallara, við hliðina á lyftunni.

Almenn bílastæði eru á bak við Safnahúsið, innáakstur frá Eyrargötu. Þar er eitt bílastæði fyrir hreyfihamlaða, við hliðina á inngangi í húsið með aðgengi fyrir hreyfihamlaða. Almenn bílastæði eru einnig í Hafnarstræti, við enda gangstéttar að framanverðu við húsið.