Um ljósmyndasafnið

Í myndasafni Ljósmyndasafnsins á Ísafirði eru varðveittar um 800 þúsund ljósmyndir af ýmsum stærðum og gerðum. Elstu myndirnar eru frá 1866 og þær yngstu frá yfirstandandi ári. Myndefnið er fjölbreytt og má þar helst nefna mannamyndir teknar á ljósmyndastofum, fréttamyndir tilheyrandi blaðaútgáfu, söfn atvinnuljósmyndara með blönduðu efni og landslags- og fjölskyldumyndir áhugaljósmyndara.

MARKMIÐ safnsins er að safna, skrá og varðveita ljósmyndaefni, svo sem ljósmyndir, glerplötur, filmur og skyggnur, sem og önnur gögn og skjöl sem tengjast greininni og hafa menningarsögulegt gildi fyrir héraðið. Við rekstur safnsins er lögð áhersla á að varðveisla mynda, filma og annarra gagna sé eins og best verður á kosið. Ennfremur að veita aðgang að þeim á safninu eða með stafrænum hætti á vefnum. Safnið tekur við og varðveitir efni frá fyrirtækjum, stofnunum og einkaaðilum, sé þess óskað.

SAFNIÐ er í eigu Ísafjarðarbæjar. Bæjarráð Ísafjarðarbæjar fer með stjórn safnsins og gerir tillögur til bæjarstjórnar um stefnumörkun í málefnum þess og hefur eftirlit með að samþykktum og stefnu sé fylgt. Stjórn og rekstur er að öðru leyti í höndum forstöðumanns safnsins. Ljósmyndasafnið starfaði sem deild í héraðsskjalasafninu frá 1970, en hefur verið sjálfstæð stofnun frá flutningi þess í Safnahúsið árið 2003. Það starfar samkvæmt Samþykkt fyrir Ljósmyndasafnið Ísafirði frá 2003 og samkvæmt lögum um söfn, um höfundarrétt og lögum um meðferð menningarverðmæta.

SAFNKOSTUR er um 800.000 ljósmyndir á glerplötum, filmum og pappír auk stafrænna mynda. Meginhluti safnsins eru myndir frá ljósmyndurum er starfað hafa á Ísafirði allt frá árinu 1889, m.a. Ljósmyndastofa Björns Pálssonar, Ljósmyndastofa M. Simson, Ljósmyndastofa Jóns Aðalbjarnar Bjarnasonar, Arnþrúðar Aspelund, Ljósmyndastofa Ísafjarðar, Ljósmyndastofa Leós Jóhannssonar og Ljósmyndastofan Myndás. Safnið varðveitir ennfremur myndasöfn fréttablaða sem gefin hafa verið út á svæðinu, m.a. Vestfirska fréttablaðið og Bæjarins besta. Er þar um að ræða stór söfn sem innihalda pappírsmyndir, filmur og stafrænar myndir, áætlað umfang um 400.000 myndir. Fjölmörg myndasöfn einstaklinga eru á safninu og þar stærst myndasafn Jóns Hermannssonar, loftskeytamanns á Ísafirði (um 10.000 myndir), safn Sigurgeirs B. Halldórssonar (um 1.000 myndir), safn Hauks Sigurðssonar ljósmyndara (um 24.000 myndir) og Þorsteins J. Tómassonar (um 76.000 myndir).