Þjónusta
Þjónusta við almenning og sveitarfélög felst m.a. í því að svara fyrirspurnum úr skjölum og aðstoða gesti safnsins. Enn fremur tekur safnið á móti einkaskjalasöfnum frá einstaklingum, félögum og fyrirtækjum og varðveitir þau þar sem þau veita aðra innsýn í sögu og mannlíf heldur en skjöl frá opinberum aðilum.
Þjónusta við sveitarfélög felst í því að varðveita skv. lögum þau skjöl sem verða til á þeirra vegum. Skjalaverðir aðstoða og veita leiðbeiningar við afhendingu og frágang skjalanna.
Héraðsskjalasafnið er öllum opið án aðgangseyris.
Aðgangur að skjölum
Aðgangur að skjölum varðveittum á safninu er skv. upplýsingalögum nr. 50/1996, lög um persónuvernd og meðferð persónuupplýsinga nr. 77/2000, stjórnsýslulögum nr. 37/1993 og/eða öðrum lögum sem gilda þar um. Nánari upplýsingar gefa starfsmenn safnsins.
Skjalasafn Ísafjarðar er opið öllum án aðgangseyris. Að jafnaði gildir sú regla að hverjum þeim, sem þess óskar, er heimill aðgangur að skjölum í vörslu safnsins.
Á þessu eru nokkrar undantekningar sem flestar lúta skjölum um einka- eða fjárhagsmálefni einstaklinga sem sanngjarnt er og eðlilegt að leynt fari, nema sá samþykki sem í hlut á. Sömu takmarkanir gilda um aðgang að skjölum sem varða mikilvæga fjárhags- eða viðskiptahagsmuni fyrirtækja og annarra lögaðila. Takmarkaður aðgangur getur verið að ákveðnum skjölum um viðskipti stofnana og fyrirtækja sveitarfélagsins að því leyti sem það er í samkeppni við aðra.
Skjöl sem innihalda upplýsingar um persónulega hagi einstaklinga, eru ekki opin öðrum en þeim sem málið varðar fyrr en að 80 árum liðnum frá myndun þeirra. Sækja þarf skriflega um aðgang að trúnaðarskjölum og framvísa gildum persónuskilríkjum með ljósmynd við komu á safnið.
Mögulegt er að takmarka þurfi aðgang að skjölum vegna þess að þau séu í slæmu ástandi. Misjafn aðgangur er að einkaskjalasöfnum, enda geta afhendingaraðilar sett skilyrði um aðgang.
Pantanir og afgreiðsla skjala
Í afgreiðslu Skjalasafns Ísafjarðar fá gestir afhent skjöl sem skoða má á lesstofu safnsins. Misjafnt er hversu fljótlegt er að afgreiða skjöl og getur stundum verið gott að panta skjöl fyrirfram. Hægt er að panta skjöl og senda fyrirspurnir í tölvupósti og í síma 450 8226.
Lestrarsalur
Lestrarsalur Skjalasafns Ísafjarðar er í Safnahúsinu við Eyrartún, Gamla sjúkrahúsinu, 2. hæð. Á lestrarsalinn koma þeir sem vilja fá skjöl eða aðrar upplýsingar tengdar starfsemi skjalasafnsins. Misjafnt er hversu fljótlegt er að afgreiða skjöl og getur verið gott að panta þau fyrirfram. Á salnum eru tengi fyrir tölvur og í húsinu er þráðlaus nettenging.
Eftirfarandi reglur gilda um notkun skjala á lestrarsal Skjalasafns Ísafjarðar:
Gestir skulu snúa sér til skjalavarðar í afgreiðslu með fyrirspurnir sínar og hlíta fyrirmælum hans.
Gestir skulu hafa hljótt um sig og eru beðnir að valda ekki öðrum ónæði. Notkun farsíma er bönnuð á lesstofu.
Neysla matar og drykkjar er óheimil á lesstofu.
Bannað er að skrifa í bækur og skjöl eða merkja á nokkurn hátt. Óheimilt er að fylgja línum með fingri, penna- og blýantsoddi. Gögnin eru heldur ekki ætluð sem undirlag við lestur eða skriftir.
Ekki má láta bækur hvíla á borðbrún eða liggja í kjöltu sér. Slíkt veldur skemmdum á bókarkili eða blöðum þegar flett er. Skylt er að sýna fyllstu aðgát og tillitssemi í meðferð bóka og skjala og hafa hreinlæti og snyrtimennsku ætíð í heiðri.
Hver gestur fær að öllu jöfnu mest lánaðar 3 bækur, böggla eða öskjur í senn. Skjölum í skjalabögglum skal halda í sömu röð og þegar þeir eru afhentir.
Gögnum skal skilað til skjalavarðar á lesstofu eigi síðar en 10 mínútum fyrir lokun.
Leita skal heimildar skjalavarðar fyrir ljósritun og skal hann almennt sjá um hana. Gjaldskrá fyrir ljósritun liggur frammi.
Heimilt er að ljósmynda skjöl með myndavél, brjóti það ekki í bága við lög sbr. Upplýsingalög nr. 50/1995 og Lög um persónuvernd og meðferð persónupplýsinga nr. 77/2000. Ávallt skal þó fá samþykki skjalavarða áður en skjöl eru ljósmynduð.
Gæta skal fyllstu varúðar við myndatökuna og gæta þess að skemma ekki skjöl eða bækur með þvingunum eða öðrum hætti. Ekki reyna að slétta blaðrönd sem er trosnuð (rifin og slitin) eða beygluð. Hafa skal samband við skjalavörð í slíkum tilvikum.
Ekki má nota leifturljós (e.flash) við myndatöku.
Ekki má mynda skjöl sem innihalda viðkvæmar persónuupplýsingar.
Ekki má mynda skjöl sem eru varin af höfundarréttarákvæðum svo sem ljósmyndir með höfundarnafni.