Sumarlestur fyrir börn
Eftir örfáa daga hefst sumarfrí grunnskólabarna og því langar okkur að minna á Sumarlesturinn sem verður á dagskrá hér líkt og undanfarin ár.
Eftir örfáa daga hefst sumarfrí grunnskólabarna og því langar okkur að minna á Sumarlesturinn sem verður á dagskrá hér líkt og undanfarin ár. Sumarið tilvalinn tími til að njóta yndislesturs og um leið viðhalda lestrarfærni, auka orðaforða, bæta stafsetningu og málfræði. Er þetta 10. árið sem Bókasafnið verður með Sumarlestur fyrir grunnskólabörn í 1. - 6. bekk í Ísafjarðarbæ. Stendur leikurinn yfir 28.maí – 18.ágúst.
Til að vera með mæta börnin á bókasafnið með bókasafnsskírteini, skrá sig til leiks og fá lánaðar bækur. Hvetjum foreldra til að taka þátt í þessu með okkur og koma með börnum sínum á bókasafnið til að aðstoða þau við að skrá sig og að velja bækur. Það er mikilvægt að börnin finni lesefni sem þeim finnst skemmtilegt og sem hæfir lestrargetu þeirra. Foreldrar barna í 1.- 3. bekk sem fá sitt fyrsta skírteini komi með börnunum, en fyrsta skírteini er ókeypis.
Þegar bók er skilað fer miði í lukkupottinn. Úr honum verður dregið fimm sinnum yfir sumarið, um eina bók í einu. Í lok sumars verður að vanda haldin vegleg uppskeruhátíð og dregið um fína bókavinninga. Allir sem hafa verið virkir þátttakendur, þ.e. skráð sig í leikinn og skilað a.m.k. einni bók, fá viðurkenningarskjal og lítinn glaðning.
Vonumst til að sem flest börn taki þátt í Sumarlestrinum!