Sigrid Valtingojer - opnun sýningar
Listasafn Ísafjarðar sýnir valin verk Sigrid Valtingojer úr safneign Listasafns ASÍ. Sigrid Valtingojer (1935-2013) fæddist í Teplitz í Tékklandi en var búsett í Þýskalandi á árunum 1945-1961. Hún stundaði nám í Þýskalandi á árunum 1954-1958 en fluttist til Íslands árið 1961.
Listasafn Ísafjarðar sýnir valin verk Sigrid Valtingojer úr safneign Listasafns ASÍ.
Sigrid Valtingojer (1935-2013) fæddist í Teplitz í Tékklandi en var búsett í Þýskalandi á árunum 1945-1961. Hún stundaði nám í Þýskalandi á árunum 1954-1958 en fluttist til Íslands árið 1961 og vann við auglýsingateiknun fyrstu árin. Sigrid lauk námi frá Myndlista- og handíðaskóla Íslands 1979 og kenndi við grafíkdeild skólans á árunum 1986-2001. Hún var gestakennari og gestalistamaður við Kyoto Seika listaháskólann í Kyoto 1990 og stundaði framhaldsnám við Winchester School of Art í Barcelona 2001-2002.
Sigrid stofnaði eigið verkstæði og vann þar til dauðadags. Hún vann verk sín með mismunandi tækni og í Listasasafni ASÍ er að finna ætingar/akvatintur, dúkristur, tréristur, frottageverk, carbarundum og þurrnál. Sigrid var heimsborgari, ferðaðist mikið og sýndi verk sín víða erlendis, en hún hélt einnig fjölda einkasýninga hér á landi. Íslenskt landslag var uppspretta margra verka hennar, einnig voru umhverfis- og friðarmál henni hugleikin.
Árið 2013 fékk Listasafn ASÍ afhent dánargjöf Sigrid Valtingojer, en hún arfleiddi safnið af öllum verkum sínum að sér látinni auk höfundarréttar. Í safninu eru um 300 grafíkverk, flest þeirra í nokkrum eintökum.
Sýningin verður opin á opnunartíma Safnahússins kl. 12-18 virka daga og 13-16 á laugardögum. Hún stendur frá 10. nóvember til 1. desember 2018 en víkur þá fyrir jólasýningu safnsins fram yfir áramót og verður aftur til sýnis 5. – 26. janúar 2019.
Sýningin opnar laugardaginn 10.nóvember kl. 14:30 og eru allir velkomnir.