Varðveitum vestfirska húsasögu
Fyrir skemmstu fékk Skjalasafnið skjalaafhendingu sem innihélt m.a. kaupsamninga, afsöl, iðgjöld o.fl. vegna Sundstrætis 25a á Ísafirði. Elsta skjalið er kaupsamningur frá 1858 auk fleiri kaupsamninga frá 19. öldinni sem gefa góðar upplýsingar um eigendasögu hússins, sem er með þeim elstu á Ísafirði.
Skjalasafninu berast á hverju ári margar fyrirspurnir um gömul hús á svæðinu og því er ómetanlegt að fá gögn sem geta verið mikilvægar heimildir í húsasögu vestfirskra byggða. Á það einnig við um gamlar ljósmyndir af húsum sem oft eru einu heimildirnar sem menn hafa í höndunum þegar gömul hús eru gerð upp.
Við viljum hvetja fólk til að skila á safnið kaupsamningum, virðingum og öðrum gögnum er varða gömul hús svo varðveita megi sögu þeirra til framtíðar og auðvelda húseigendum og þeim sem gera upp gömul hús, aðgengi að upplýsingum.