Nýr vefur um ráðgjöf og eftirlit með skjalavörslu og skjalastjórn
Þjóðskjalasafn Íslands hefur opnað nýjan vef fyrir ráðgjöf og eftirlit með skjalavörslu og skjalastjórn. Markmiðið með vefnum er að auðvelda aðgengi að reglum, leiðbeiningum og hvers konar fræðslu fyrir afhendingarskylda aðila er tengist skjalavörslu og skjalastjórn.
Þá er á vefnum að finna ítarlegar upplýsingar um eftirlit safnsins með skjalahaldi afhendingarskyldra aðila, s.s. um feril eftirlitsheimsókna, þroskastig, áhættumat og eftirfylgni. Einnig er í fyrsta skipti birtur listi yfir eftirlitsskylda aðila á vef safnsins, en rétt er að taka fram að listinn er ekki tæmandi. Meðal annarra nýjunga á vefnum er að birt eru lögfræðiálit sem Þjóðskjalasafn hefur látið vinna um ýmsa þætti í skjalavörslu og skjalastjórn og reifun á frumkvæðisathugunum sem safnið hefur staðið fyrir frá árinu 2015.
Nýr vefur um ráðgjöf og eftirlit með skjalavörslu og skjalastjórn er birtur á sérstöku undirléni, https://radgjof.skjalasafn.is/.
