Skjalasafnið fær gögn frá Skíðafélagi Ísfirðinga
Fulltrúar Skíðafélags Ísfirðinga mættu í gær á skjalasafnið með skjöl sem höfðu verið varðveitt í bankahólfi um árabil. Eitthvað var farið að fyrnast yfir hvaða dýrgripir væru varðveittir í hólfinu en í ljós kom að þar lágu m.a. fundagerðabækur skíðalyftunefndar og skíðaskálanefndar, gestabækur úr skíðaskálum, bókhaldsgögn og fleira.
Þótti eðlilegt að þessi skjöl yrðu varðveitt á skjalasafninu þar sem þau verða flokkuð, skráð og gerð aðgengileg fyrir þá sem áhuga hafa á að skoða þau. Fyrr á árinu höfðu safninu borist fleiri gögn frá Skíðafélaginu og má geta þess að safnið varðveitir talsvert magn af skjölum og ljósmyndum sem tengjast skíðastarfi á Ísafirði fyrr og síðar.
